കുരുമുളക് തൈകള്‍ തയ്യാറാക്കുന്നതിന് മുമ്പ്കുരുമുളക് തൈകള്‍ തയ്യാറാക്കുന്നതിന് മുമ്പ്

ഉൽപാദന ശേഷി കൂടിയ കുരുമുളകിൽ നിന്നും കൊടിയുടെ ചുവട്ടിൽ നിന്നുമുണ്ടാകുന്ന ചെന്തലകൾ ഫെബ്രുവരി-മാർച്ച് മാസങ്ങളിൽ മുറിച്ചെടുക്കുന്നതാണ് തൈയുണ്ടാക്കുന്നതിലെ ആദ്യ ഘട്ടം.

നല്ല വിളവു തരുന്നതും പുഷ്ടിയോടെ വളരുന്നതും നീളം കൂടിയ തിരകളുളളതും ആയിരിക്കണം മാതൃവളളി. രോഗങ്ങളെ പ്രതിരോധിക്കാനുളള ശേഷി നിർബന്ധം. തിരി പിടിത്തവും മണി പിടുത്തവും കൂടെയുണ്ടെങ്കിൽ ഉത്തമ മാതൃസസ്യമായി. പ്രായം 5 വയസിനും 12 നുമിടയിലായിരിക്കണം.

വളളിത്തലയിൽ നടുവിലെ മൂന്നിലൊന്ന് ഭാഗമാണ് നടാൻ ഉപയോഗിക്കേണ്ടത്. ഇളം തലപ്പും കടുത്ത മൂത്ത ഭാഗവും ഒഴിവാക്കണം. രണ്ടോ മൂന്നോ മുട്ടുകളുളള കഷണങ്ങൾ മുറിച്ച് ഇലഞെട്ട് തണ്ടിൽ നിൽക്കത്തക്ക വണ്ണം ഇലകൾ മുറിച്ചുമാറ്റാം. ഇങ്ങനെ തയ്യാറാക്കിയ തണ്ടുകളുടെ കടഭാഗം മുരിങ്ങയില ചാറിൽ അരമണിക്കൂർ മുക്കിവെക്കണം. 50 ഗ്രാം ഇളം മുരിങ്ങയില 200 മില്ലി വെളളത്തിൽ അരച്ചെടുത്ത് മുരിങ്ങയിലച്ചാറ് തയ്യാറാക്കാം.

കുരുമുളക് നഴ്സറിയിലെ രോഗബാധ ഒഴിവാക്കാൻ 250 ഗ്രാം സ്യൂഡോമോണാസ്, 750 മില്ലി വെളളത്തിൽ കലക്കി 20 മിനിറ്റ് വെച്ചതിന് ശേഷം പോട്ടിംഗ് മിശ്രിതംനിറച്ച പോളിത്തീൻ കവറിൽ തണ്ട് നടാം.

മേൽമണ്ണും മണലും ചാണകപ്പൊടിയും ഒരേ അനുപാതത്തിൽ ചേർത്ത് പോട്ടിംഗ് മിശ്രിതം തയ്യാറാക്കാവുന്നതാണ്. തയ്യാറാക്കിയ തണ്ടുകളുടെ ഒരു മുട്ട് മണ്ണിനടിയിൽ വരത്തക്കവിധം നടാം.
നട്ട ഉടനെ തന്നെ പന്തൽ തയ്യാറാക്കി തണൽ നൽകണം. ഒപ്പം നനയും നിർബന്ധം. തിരുവാതിര ഞാറ്റുവേലയിൽ ജൂൺ-ജൂലൈ മാസത്തിൽ വേരുപിടിപ്പിച്ച കുരുമുളക് തൈകൾ നടാം.

Content highlights: Agriculture, Organic farming, Pepper saplings