തെങ്ങോലകള്‍ ഒടിഞ്ഞുതൂങ്ങാതിരിക്കാന്‍ ശാസ്ത്രീയ മാര്‍ഗങ്ങള്‍ സ്വീകരിക്കാംതെങ്ങോലകള്‍ ഒടിഞ്ഞുതൂങ്ങാതിരിക്കാന്‍ ശാസ്ത്രീയ മാര്‍ഗങ്ങള്‍ സ്വീകരിക്കാം

ഞങ്ങളുടെ പറമ്പിലെ തെങ്ങിന്റെ ഓലകൾ മടലോടുകൂടി താഴേക്ക് ഒടിയുന്നു. ഒരു വർഷം മുമ്പ് 5 വർഷം മൂപ്പുളള തൈ കൂമ്പോടുകൂടി ചീഞ്ഞ് ഒടിഞ്ഞുപോയിരുന്നു. ഉപ്പും പൂഴിയും കലർത്തി തൈകളുടെ കൊരലിൽ ഇടാൻ കൃഷിഭവനിൽ നിന്നു പറഞ്ഞു. എല്ലാത്തിനും ഇതു ചെയ്തു. പക്ഷെ ഇപ്പോഴും തൈത്തെങ്ങുകളുടെ ഓലകൾ ഒടിഞ്ഞു താഴുന്നു. ഇതിന് കാരണം എന്ത്? പ്രതിവിധി എന്താണ്? തെങ്ങിന് ഉപ്പിട്ടാൽ നല്ലതാണോ? മാതൃഭൂമി കാർഷിക രംഗത്തിൽ മറുപടി പ്രതീക്ഷിക്കുന്നു. - ബാലാമണി, കാരയാട്, മേപ്പയ്യൂർ , കോഴിക്കോട്

തെങ്ങോലകൾ ഒടിഞ്ഞുതൂങ്ങുന്നത് പ്രധാനമായും കുമിൾവരുത്തുന്ന മൂന്നു രോഗാവസ്ഥകളിലാണ്. ഇതിലൊന്ന് ചെന്നീരൊലിപ്പ് എന്ന കുമിൾ രോഗമാണ്. ചെന്നീരൊലിപ്പിൽ മറ്റു പ്രധാന ലക്ഷണങ്ങൾക്കു പുറമെ പുതുതായി വിരിയുന്ന ഓലകളുടെ വലിപ്പം കുറയുന്നതിനോടൊപ്പം രോഗത്തിന്റെ മൂർദ്ധന്യാവസ്ഥയിൽ അടിയോലകൾ ഒടിഞ്ഞുതൂങ്ങാറുണ്ട്.

മറ്റൊന്ന് കുമിൾ രോഗമായ കൂമ്പുചീയലാണ്. ഇതിൽ നാമ്പോലകൾ മഞ്ഞളിച്ച് രോഗം മൂർച്ഛിക്കുന്നതോടെ നാമ്പോല ഉണങ്ങി വാടുകയോ ഒടിഞ്ഞു തൂങ്ങുകയോ ചെയ്യാറുണ്ട്.

തഞ്ചാവൂർ വാട്ടം എന്ന കുമിൾ രോഗത്തിലും പ്രധാന ലക്ഷണത്തോടൊപ്പം പുറം മടലുകൾ ഉണങ്ങി ഒടിഞ്ഞു തൂങ്ങുക പതിവുണ്ട്.

ചോദ്യത്തിൽ പറഞ്ഞിരിക്കുന്ന സൂചനകളിൽ നിന്നും തെങ്ങുകൾക്ക് കൂമ്പുചീയൽ ബാധിച്ചതായി കാണുന്നു. പ്രത്യേകിച്ച് പ്രായം കുറഞ്ഞ തെങ്ങുകളിൽ. ഈ സാഹചര്യത്തിൽ കുമിൾബാധ നിയന്ത്രണ വിധേയമാക്കാനുളള ശാസ്ത്രീയമാർഗ്ഗങ്ങളാണ് ഇവിടെ ഇനിയും താമസിയാതെ ചെയ്യേണ്ടത്.

ഒടിഞ്ഞു തൂങ്ങിയ ഓലകൾ നീക്കി തെങ്ങിൻമണ്ട വൃത്തിയാക്കി ഒരു ശതമാനം വീര്യമുളള ബോർഡോമിശ്രിതം തളിക്കുക.

100 ഗ്രാം തുരിശും 100 ഗ്രാം ചുണ്ണാമ്പും വെവ്വേറെ 500 മി. ലി. വീതം വെളളത്തിൽ കലക്കി ലയിപ്പിച്ച് ഒരു ലിറ്റർ ബോർഡോ കുഴമ്പ് തയാറാക്കി വൃത്തിയാക്കിയ ഭാഗങ്ങളിൽ മണ്ടയിൽ പുരട്ടുകയും ചെയ്യാം.

കുമിൾ നാശിനിയായ മാങ്കോസെബ് രണ്ടു ഗ്രാം വീതം തുണിയിൽ കിഴി കെട്ടിയോ പോളിത്തീൻ പാക്കറ്റിലാക്കി സുഷിരങ്ങളിട്ടോ കൂമ്പിനു തൊട്ടുതാഴെയുളള ഓലക്കവിളുകളിൽ ചരടു കൊണ്ട് കെട്ടിയിടണം. ചുറ്റുമുളള തെങ്ങുകൾക്കും ഒരു ശതമാനം വീതമുളള ബോർഡോ മിശ്രിതം പ്രതിരോധമായി തളിക്കണം.

20 ഗ്രാം സ്യൂഡോമോണസോ പി.ജി.പി.ആർ 2 മിശ്രിതമോ ഒരു ലിറ്റർ വെളളത്തിൽ കലക്കി മണ്ട കുതിർക്കെ ഒഴിക്കുന്നത് കുമിൾ ബാധകൾ പ്രതിരോധിക്കും.

തെങ്ങൊന്നിന് 50 കി. ഗ്രാം എന്ന തോതിൽ ജൈവവളം ചേർക്കുക

മൂന്നു മാസത്തിലൊരിക്കൽ തെങ്ങിൻ തടത്തിൽ തെങ്ങിന്റെ ചുവട്ടിൽ നിന്ന് 1.5 മീറ്റർ വിട്ട് ഒരു മീറ്റർ ആഴത്തിലും 50 സെ.മീ. വീതിയിലും ചാലെടുത്ത് തടം നനയ്ക്കുക. എന്നിട്ട് ഒരു ശതമാനം വീര്യമുളള ബോർഡോ മിശ്രിതം 40 ലിറ്റർ വീതം തടത്തിൽ ഒഴിച്ചു കൊടുക്കണം.

മണ്ണിലാണ് കുമിളുകളിൽ പലതും സുഷുപ്താവസ്ഥയിൽ കഴിയുന്നത് എന്നതിനാൽ മണ്ണിന്റെ പുളിരസം കുറയ്ക്കാൻ ഒരു തെങ്ങിന് ഒരു വർഷം ഒരു കി. ഗ്രാം ഡോളോമൈറ്റോ കുമ്മായമോ ചേർക്കാം.

തെങ്ങിൻ തടത്തിൽ ഉപ്പു ചേർക്കുന്നത് നല്ലതാണ്. പ്രത്യേകിച്ച് മഴക്കാലത്ത്. മറ്റു ജൈവവളങ്ങളോടൊപ്പം ഒരു കിലോ കറിയുപ്പ് ഒരു വർഷം നല്കാം.

കറിയുപ്പിൽ അടങ്ങിയിരിക്കുന്ന മൂലകങ്ങളായ സോഡിയം, ക്ലോറിൻ എന്നിവയുടെ പ്രയോജനവും തെങ്ങിന് ലഭിക്കും. എന്നാൽ അമിതമായ കറിയുപ്പ് ഉപയോഗം ഓലകൾ ഒടിഞ്ഞു തൂങ്ങാൻ കാരണമാകും എന്നറിഞ്ഞിരിക്കുക.

കാലാവസ്ഥയ്ക്കും സാഹചര്യത്തിനും അനുസൃതമായി മേൽപറഞ്ഞ ശാസ്ത്രീയ രീതികൾ പ്രയോഗിച്ച് തെങ്ങിന്റെ ഓലകൾ ഒടിഞ്ഞുതാഴുന്നത് ഫലപ്രദമായി തടയാൻ കഴിയും.

Content Highlights:cocunut palm, farm care