സപ്പോട്ടയുടെ കുടുംബക്കാരനായ മില്‍ക്ക് ഫ്രൂട്ട്സപ്പോട്ടയുടെ കുടുംബക്കാരനായ മില്‍ക്ക് ഫ്രൂട്ട്

പർപ്പിൾ നിറത്തിൽ പഴത്തിനുള്ളിൽ നിന്ന് സാക്ഷാൽ പാൽ പോലെ വെളുത്ത കാമ്പും ദ്രാവകവും - ഇതാണ് മിൽക്ക് ഫ്രൂട്ട് എന്ന പാൽപ്പഴം. സപ്പോട്ടപ്പഴത്തിന്റെ കുടുംബക്കാരനാണ് മിൽക്ക് ഫ്രൂട്ടും. സ്റ്റാർ ആപ്പിൾ, കയ്നിറ്റോ തുടങ്ങി വിവിധ വിളപ്പേരുകൾ ഈ ഉഷ്ണമേഖലാഫലവൃക്ഷത്തിനുണ്ട്.

പരിചയം

മധ്യഅമേരിക്കയും വെസ്റ്റീൻഡീസുമാണ് മിൽക്ക് ഫ്രൂട്ടിന്റെ ജന്മദേശം. വിയറ്റ്നാമിൽ ഈ പഴം വു സുവ എന്നാണറിയപ്പെടുന്നത്. മുലപ്പാൽ എന്നാണിതിനർഥം. പാൽപ്പഴങ്ങളുടെ കൂട്ടത്തിൽ ഏറ്റവും പ്രമുഖ ഇനമായ ലോ റെൻ മിൽക്ക്ഫ്രൂട്ട് , വിയറ്റ്നാമിലെ ചൗ താൻ ജില്ലയിൽ നിന്നാണ് എത്തുന്നത്.

അമേരിക്കയ്ക്കു പുറമെ ഏഷ്യൻ ഉഷ്ണമേഖലാ പ്രദേശങ്ങൾ, ആഫ്രിക്ക എന്നിവിടങ്ങളിൽ പാൽപ്പഴം വാണിജ്യാടിസ്ഥാനത്തിൽ വളർത്തുന്നു. ഇന്ത്യൻ വഴിയോരങ്ങളിൽ ഇത് അധികമാരും ശ്രദ്ധിക്കപ്പെടാതെ തന്നെ വളരുകയോ വളർത്തുകയോ ചെയ്യുന്നുണ്ട്.

15 മീറ്റർ വരെ ഉയരത്തിൽ മിൽക്ക് ഫ്രൂട്ട് മരം ഉയരും. ശിഖരങ്ങളിൽ വിടരുന്ന പാൽപ്പഴത്തിന് കോൺ ആകൃതിയാണ്; പർപ്പിൾ നിറത്തിലുള്ള പുറംതൊലി. പഴത്തിനുള്ളിൽ നക്ഷത്രാകൃതി വ്യക്തമായി കാണാം. ഉൾക്കാമ്പിന്റെ നക്ഷത്രാകൃതിയിലുള്ള ഈ ഡിസൈൻ ആണ് ഇതിന് സ്റ്റാർ ആപ്പിൾ എന്ന പേര് കിട്ടാൻ കാരണം.



പ്രജനനവും കൃഷിയും

വിത്തുപാകി തൈകൾ വളർത്തിയെടുക്കാമെങ്കിലും വിത്തുതൈകൾ തമ്മിൽ കാണപ്പെടുന്ന വലിയ വ്യതിയാനങ്ങൾ നിമിത്തം പലരും ഈ രീതി സ്വീകരിക്കുന്നില്ല.ഗ്രാഫ്റ്റിങ്ങ്, ലെയറിങ്ങ് രീതികൾ വഴിയാണ് തൈകൾ ഉത്പാദിപ്പിക്കുന്നത്. വെനീർ ഗ്രാഫ്റ്റിങ്ങ് , ഷീൽഡ് ബഡ്ഡിങ്ങ്, എയർ ലെയറിങ്ങ് മുതലായ പ്രജനനമുറകൾ ആണ് സാധാരണ സ്വീകരിക്കുക.

വിത്തുതൈകൾ ചിലയവസരങ്ങളിൽ കായ്കൾ തന്നെ ഉത്പാദിപ്പിക്കാതിരിക്കാനും മതി. വിത്തുതൈകൾ കായ് പിടിക്കാൻ 5 മുതൽ 10 വർഷം വരെ എടുത്തേക്കാം. വെള്ളക്കെട്ടില്ലാത്ത സ്ഥലത്തും വളരാൻ മടിയില്ലാത്ത പാൽപ്പഴത്തിന് വേഗം വളരുന്ന പ്രകൃതമാണ്. ഒരിക്കൽ വേരുപിടിച്ചു കഴിഞ്ഞാൽ ഏത് പ്രതികൂല സാഹചര്യവും തരണം ചെയ്യാൻ ഇതിന് കഴിയും. ക്ഷാരസ്വഭാവമുള്ള മണ്ണിനോട് ഈ ചെടിക്ക് പ്രത്യേകപ്രതിപത്തി തന്നെയുണ്ട്. അധികം പേരെടുത്ത ഇനങ്ങളൊന്നും പാൽപ്പഴത്തിനില്ല. എങ്കിലും കടുത്ത പർപ്പിൾ നിറമുള്ള ഹെയ്ത്തിയൻ ഇനം ഒട്ടുതൈകളായി വളർത്തി വളരെയധികം പ്രചാരം നേടിയിരിക്കുന്നു.

വളർച്ചയുടെ ആദ്യവർഷം ചെടി നനച്ചു വളർത്തിയാൽ നന്നായിരിക്കും. തുടർ വർഷങ്ങളിൽ ഇത് നിർബന്ധമില്ല. ജൈവവളങ്ങൾക്കു പുറമേ രാസവളപ്രയോഗവും നടത്താം. വളർച്ചയുടെ ആദ്യവർഷം ചെടി നനച്ചു വളർത്തിയാൽ നന്നായിരിക്കും. തുടർ വർഷങ്ങളിൽ ഇത് നിർബന്ധമില്ല. ജൈവവളങ്ങൾക്ക് പുറമേ രാസവളപ്രയോഗവും നടത്താം. വളർച്ചയുടെ ആദ്യവർഷം മൂന്നുമാസത്തിലൊരിക്കൽ ഒരു ചെടിക്ക് 100 ഗ്രാം വീതം രാസവളമിശ്രിതം നൽകാം. ഇത് ക്രമേണ വർധിപ്പിച്ച് വളർച്ചയെത്തിയ ഒരു മരത്തിന് 400-500 ഗ്രാം വരെ ചേർക്കാം. രാസവളം തുല്യ അളവുകളായി വീതിച്ച് വെവ്വേറെ നൽകുകയാണ് നല്ലത്.ചെടികളുടെ തടത്തിൽ പുതയിടുന്നതും നല്ലതാണ്.ചുവട്ടിൽ 20-30 സെ.മീ കനത്തിൽ പുതയിടാം. വളർച്ച നിയന്ത്രിച്ചു നിർത്താൻ കൊമ്പുകോതൽ നടത്താം.

വിളവ്

വിത്തുതൈകളേക്കാൾ വേഗം വിളവ് തരുന്നത് ഒട്ടുതൈകൾ,ബഡ്ഡുതൈകൾ എന്നിവ വളർത്തിയെടുക്കുന്ന മരങ്ങളാണ്. പഴങ്ങൾ പഴുത്ത് പൊഴിയുന്ന പതിവ് ഇതിൽ വളരെക്കുറവാണ്.

വിളഞ്ഞ പഴങ്ങൾ ഞെട്ടുചേർത്ത് മുറിച്ചെടുക്കണം. മൂപ്പ് പാകമല്ലെങ്കിൽ പഴത്തിൽ കറ കാണും. ഭക്ഷ്യയോഗ്യവുമാകില്ല. നന്നായി പഴുത്ത പഴത്തിന്റെ തൊലിക്ക് മങ്ങിയ നിറവും തെല്ലു ഞൊറിവുകളും വീണിട്ടുണ്ടാകും. തൊട്ടാൽ മൃദുവുമായിരിക്കും.ഇന്ത്യൻ സാഹചര്യങ്ങളിൽ ഫെബ്രുവരി മുതൽ മാർച്ച് വരെയുള്ള വിളവെടുപ്പ് കാലത്ത് പൂർണ വളർച്ചയെത്തിയ ഒരു മരം 60 കിലോ വരെ പഴം തരും. പഴുത്ത പഴങ്ങൾ മൂന്ന് ആഴ്ചയോളം കേടുകൂടാതെ സൂക്ഷിക്കാം.

മേന്മകൾ

പഴം തോലു പൊളിച്ച് ഉൾക്കാമ്പെടുത്തും തണുപ്പിച്ചും കഴിക്കാൻ നല്ലതാണ്. പൈനാപ്പിൾ തുടങ്ങിയ പഴങ്ങളുമായി ചേർത്ത് ഫ്രൂട്ട് സലാഡ് തയ്യാറാക്കിയാൽ സ്വാദിഷ്ടം.

പാൽപ്പഴം, ഓറഞ്ച് നീരുമായി ചേർത്ത് തയ്യാറാക്കുന്ന മാട്രിമോണി എന്ന മധുര പദാർഥം ജമൈക്കയിൽ പ്രചുര പ്രചാരം നേടിയ വിഭവമാണ് . പഴത്തിന്റെ അകക്കാമ്പ് എപ്പോഴും ഒരു സ്പൂൺ കൊണ്ട് ഇളക്കി എടുത്ത് കഴിക്കുകയാണ് അഭിലഷണീയം.

Content highlights: Milk fruit, Agriculture, Organic farming, Star apple