ഓമനത്തമുള്ള കാവൽക്കാർ; കരുത്തരും സമര്‍ഥരുമാണിവര്‍ ഓമനത്തമുള്ള കാവൽക്കാർ; കരുത്തരും സമര്‍ഥരുമാണിവര്‍

വീട്ടിൽ ഓമനമൃഗങ്ങളായി വളർത്താൻ ശ്വാനന്മാരേക്കാൾ മികച്ച മറ്റൊന്നില്ല എന്ന അഭിപ്രായക്കാരാണ് ഭൂരിഭാഗവും. കാണാൻ ഓമനത്തവും സൗന്ദര്യവുമുള്ള ഒരുപാട് ബ്രീഡുകൾ ഇന്ത്യയിലുണ്ട്. വിദേശരാജ്യങ്ങളിൽനിന്നു വന്നവരാണ് ഇക്കൂട്ടരിൽ ഭൂരിഭാഗവും. ഇന്ത്യയിലെ ഏറ്റവും പ്രിയപ്പെട്ട ചില ഡോഗ് ബ്രീഡുകളെ പരിചയപ്പെടാം.

1. ബീഗ്ലെസ്

വളരെ പെട്ടെന്ന് ഇണങ്ങുകയും കൂട്ടുകൂടുകയും ചെയ്യുന്ന ഇനമാണ് ബീഗ്ലെസ്. നെറ്റിയിൽ വെള്ളയോ തവിട്ടോ കലർന്ന നീളൻ പൊട്ടുതൊട്ട സുന്ദരൻ/സുന്ദരി. ലോകത്ത് ഏറ്റവുമധികം വിറ്റുപോകുന്ന വളർത്തുമൃഗങ്ങളിലൊന്നായ ബീഗ്ലെസ് ഇത്തിരിക്കുഞ്ഞനാണ്.

വലുപ്പം കുറവാണെങ്കിലും ആളങ്ങ് മിടുക്കനാണ്. എന്തും മണംപിടിച്ചു കണ്ടെത്താനുള്ള അസാമാന്യകഴിവാണ് ഇവയുടെ എടുത്തുപറയേണ്ട പ്രത്യേകത. അതുകൊണ്ടുതന്നെ വിമാനത്താവളങ്ങളിലും മറ്റും അന്വേഷണ സ്ക്വാഡുകൾക്കൊപ്പം ഉപയോഗിക്കാറുണ്ട്. 13 മുതൽ 15 വരെ ഇഞ്ചാണ് നീളം. 12 മുതൽ 15 വരെ വർഷമാണ് ആയുസ്സ്. പക്ഷേ, മനുഷ്യരുമായി വേഗത്തിൽ സൗഹൃദം സ്ഥാപിക്കുന്നതിൽ മിടുക്കനായതിനാൽ വീട്ടുകാവലിന് ഇവരെ അധികം വിശ്വസിക്കാൻ പറ്റില്ല. ഇതാണ് ഈ വിഭാഗത്തിന്റെ ഏറ്റവും വലിയ പോരായ്മയും.



2.ബുൾമാസ്റ്റിഫ്

വളരെ കരുത്തനും അതിബുദ്ധിമാന്മാരുമായ ബുൾമാസ്റ്റിഫുകൾ ബുൾഡോഗിന്റെയും മാസ്റ്റിഫിന്റെയും സങ്കരയിനമാണ്. വളരെ ആക്ടീവായ ഇവ വസ്തുക്കൾ മണത്തുനോക്കി കണ്ടുപിടിക്കുന്നതിലും ചരക്കുവലിക്കുന്നതിലും മിടുക്കരാണ്. വളരെ ചെറുപ്രായത്തിലേ ഇവയ്ക്ക് പരിശീലനം നൽകിത്തുടങ്ങിയാൽ മികച്ചയിനം വളർത്തുമൃഗമായി ഇവയെ മാറ്റാം. യജമാനനോട് എപ്പേഴും ആത്മബന്ധം കാത്തുസൂക്ഷിക്കുന്ന വർഗ്ഗംകൂടിയാണിത്. 25 മുതൽ 27 വരെ ഇഞ്ചാണ് വലുപ്പം. ഏഴുമുതൽ ഒമ്പതുവരെ വയസ്സാണ് പരമാവധി ആയുസ്സ്.



3. ഗ്രേറ്റ് ഡെയ്ൻ

ഏറ്റവും മികച്ച കാവൽനായകളിലൊന്നാണ് ഗ്രേറ്റ് ഡെയ്ൻ. ഗാർഡ് ഡോഗായി സൈന്യത്തിനും മറ്റു സ്ക്വാഡുകൾക്കൊപ്പവും കാണുന്ന ഇവയുടെ അസാമാന്യ ബുദ്ധിയാണ് എടുത്തുപറയേണ്ടത്. അതുകൊണ്ടുതന്നെ വളരെ പെട്ടെന്ന് ഇവയെ പരിശീലനം നൽകി ഉപയോഗിക്കാനാകും. എല്ലാവരുമായും പെട്ടെന്ന് ഇണങ്ങുമെങ്കിലും നൽകിയിരിക്കുന്ന ദൗത്യമെന്തെന്നു മറക്കാതെ ഭംഗിയായി ചെയ്യുന്ന സ്വഭാവക്കാരാണ്. 30 മുതൽ 32 വരെ ഇഞ്ച് ഉയരംവെയ്ക്കും. 10 മുതൽ 12 വരെ വർഷമാണ് പരമാവധി ആയുസ്സ്.



4. ലാബ്രഡോർ റിട്രൈവർ

ലാബ്രഡോറുകൾ സൗഹൃദംസ്ഥാപിക്കുന്നതിലും മനുഷ്യരുമായി ഇണങ്ങുന്നതിലും മികച്ചയിനമാണ്. ഈ പ്രത്യേകതതന്നെയാണ് ഇവയെ എല്ലാവരുടെയും പ്രിയപ്പെട്ടതാക്കുന്നത്. കിട്ടുന്നതെന്തും ആർത്തിയോടെ കഴിക്കുന്ന പ്രകൃതമായതിനാൽ പൊണ്ണത്തടിക്കുള്ള സാധ്യത വളരെക്കൂടുതലാണ്. അതുകൊണ്ടുതന്നെ ഇവയ്ക്ക്ഭക്ഷണം വളരെ സൂക്ഷ്മതയോടെവേണം നൽകാൻ. പ്രോട്ടീൻ സമൃദ്ധമായ ഭക്ഷണവും ആവശ്യമാണ്. വളരെ കട്ടികൂടിയ മുടിയും ഈർപ്പം കെട്ടിനിൽക്കാത്ത കട്ടിയുള്ള തൊലിയും പ്രത്യേകതയാണ്. വളരെ അനുസരണയുള്ളതും യജമാന സ്നേഹം കാത്തുസൂക്ഷിക്കുന്നവരുമാണ് ഇക്കൂട്ടർ. ഭക്ഷണപ്രിയരായ ലാബ്രഡോഗുകൾ 65 മുതൽ 80 വരെ കിലോഗ്രാം ഭാരംവെയ്ക്കും. 10 മുതൽ 12 വരെ വയസ്സാണ് ഇവയുടെ ആയുസ്സ്.



5. ഗോൾഡൻ റിട്രൈവർ

ഗോൾഡൻ റിട്രൈവറുകളുടെ കട്ടികൂടിയ രോമവും നീണ്ടുകിടക്കുന്ന ചെവിയും കൂടുതൽ അഴകുനൽകുന്നു. ഇതോടൊപ്പം അനുസരണശീലംകൂടിയ ഇനമായതിനാൽ മൃഗസ്നേഹികൾക്കിടയിൽ വളരെ പരിയപ്പെട്ടതാണ് ഗോൾഡൻ റിട്രൈവറുകൾ. പരിശീലനം നൽകിയാൽ മത്സരങ്ങളിലും മറ്റും മികച്ച പ്രകടനം കാഴ്ചവെയ്ക്കാൻ കഴിയും. മികച്ചകാവൽക്കാർ കൂടിയായ ഗോൾഡൻ റിട്രൈവറുകൾ അതിസമർഥന്മാർകൂടിയാണ്. 12 മുതൽ 15 വരെ വർഷമാണ് ആയുസ്സ്. 25 മുതൽ 35 വരെ കിലോഗ്രാം ഭാരമുണ്ടാകും