ബയോ ക്യാപ്‌സൂള്‍ ഉപയോഗിക്കുമ്പോള്‍ ശ്രദ്ധിക്കാന്‍ബയോ ക്യാപ്‌സൂള്‍ ഉപയോഗിക്കുമ്പോള്‍ ശ്രദ്ധിക്കാന്‍

സൂക്ഷ്മാണുക്കളാണ് മണ്ണിന്റെ ജീവൻ നിലനിർത്തുന്നവർ. ചെടികളുടെ വളർച്ച ത്വരിതപ്പെടുത്തുന്നതിനും രോഗ പ്രതിരോധത്തിനും പോഷക മൂലകങ്ങൾ ലഭ്യമാക്കുന്നതിനും തുടങ്ങി സൂക്ഷ്മാണുക്കൾക്ക് കൃഷിയിൽ പ്രധാന പങ്കുണ്ട്.

ജൈവകൃഷിയിൽ പ്രത്യേകിച്ചും മാർക്കറ്റിൽ ലഭ്യമായ സൂക്ഷ്മാണുക്കൾ ഗുണനിലവാരത്തിന്റെ മുൾമുനയിൽ നിൽക്കുന്നിടത്താണ് മിത്രസൂക്ഷ്മാണുക്കൾ അടങ്ങിയ ബയോക്യാപ്സൂളുകൾ കൃഷിയിലെ വിജയമാകുന്നത്.

നിഷ്ക്രിയ അവസ്ഥയിലായ സൂക്ഷ്മാണുക്കളും അവയെ അത്രരീതിയിൽ തന്നെ നിലനിർത്തുന്നു. ചില രാസഘടകങ്ങളും പ്രത്യേക അനുപാതത്തിലാണ് ക്യാപ്സൂളിൽ നിറക്കുന്നത്.

ഒരു ഗ്രാം മാത്രം ഭാരമുളള ഈ ക്യാപ്സൂൾ, 100 ലിറ്റർ വെളളത്തിൽ ചേർത്താൽ ഓരോ മില്ലിലിറ്റർ ലായനിയിലും 10 ദശലക്ഷം സൂക്ഷ്മാണുക്കളാണ് ഉണ്ടാവുക.

ഓരോ വിളയ്ക്കും ഓരോ ആവശ്യത്തിനും പ്രത്യേക സൂക്ഷ്മാണുക്കളാണ് ആവശ്യമായി വരിക. ബയോക്യാപ്സൂൾ വാങ്ങുമ്പോൾ ആവശ്യമായ സൂക്ഷ്മാണുക്കൾ അടങ്ങിയവ തന്നെയാണോയെന്ന് ഉറപ്പുവരുത്തണം. ഓരോ വിളയ്ക്കും ഉപയോഗിക്കേണ്ട ലായനിയുടെ തോത് നോക്കി മാത്രമേ ഉപയോഗിക്കാവൂ. മിത്ര കുമിളുകൾ അടങ്ങിയ ക്യാപ്സൂൾ 100 ലിറ്റർ വെളളത്തിൽ ചേർത്തിളക്കി 2 മണിക്കൂർ കഴിഞ്ഞ് ചെടിയുടെ ചുവട്ടിൽ ഒഴിക്കണം.

അതേസമയം മിത്രബാക്ടീരിയയാണെങ്കിൽ ഒരു ലിറ്റർ തിളപ്പിച്ചാറിയ വെളളത്തിൽ കലക്കി എട്ട് മണിക്കൂറിന് ശേഷം ഈ ലായനി 200 ലിറ്റർ സാധാരണ വെളളത്തിൽ ചേർത്ത് ഉപയോഗിക്കാം. മണ്ണിൽ ജൈവാംശവും നനയും ക്യാപ്സൂൾ ഉപയോഗിക്കുമ്പോൾ നിർബന്ധമാണ്.

പോഷകമൂല്യങ്ങളുടെ ലഭ്യതയ്ക്ക് വേണ്ടിയാണ് ക്യാപ്സൂൾ ഉപയോഗിക്കുന്നതെങ്കിൽ സാധാരണ വളപ്രയോഗം 20 ശതമാനം വരെ കുറക്കാം. കോഴിക്കോട് ഭാരതീയ സുഗന്ധ വിള ഗവേഷണ കേന്ദ്രത്തിൽ ബയോക്യാപ്സൂൾ ലഭ്യമാണ്.

Content highlights: Bio capsule, Agriculture, Organic farming