ജീവിതത്തിന്റെ വസന്ത കാലത്ത് തനിക്ക് കളിയും ചിരിയും കൂട്ടും നൽകിയ അരുമയെ ജീവിത സായാഹ്നത്തിൽ കരുതലിന്റെ തണൽ നൽകി കരുതേണ്ടത് ഉത്തരവാദിത്വമുള്ള ഉടമയുടെ കടമയാണ്. പ്രായമായ ഓമനമൃഗങ്ങളുടെ സ്ഥാനം തെരുവിലാകുന്നത് സാമൂഹ്യപ്രശ്നങ്ങളും സൃഷ്ടിക്കുന്നു. വൃദ്ധജനങ്ങളെ സംബന്ധിക്കുന്ന, വാർദ്ധക്യ സഹജ രോഗങ്ങളെക്കുറിച്ച് പഠനം നടത്തുന്ന ജെറിയാട്രിക്സ് അരുമ മൃഗങ്ങളിലും, ഓമനപക്ഷികളിലും പ്രാധാന്യം നേടുന്നു.
ശരാശരി 10-15 വർഷംവരെ ആയുർദൈർഘ്യം കണക്കാക്കാവുന്ന നായ്ക്കളിലും, പൂച്ചകളിലും ആറു വയസു കഴിയുന്നതോടെ മിക്കവാറും വാർദ്ധക്യസഹജമായ മാറ്റങ്ങൾ കണ്ടുതുടങ്ങുന്നു. ഇനമനുസരിച്ച് അരുമപക്ഷികൾ 20-80 വർഷംവരെ ആയുസ്സുള്ളവരാണ്. മുതിർന്ന പൗരന്റെ സ്ഥാനം നേടുന്നതിന്റെ ആദ്യ സൂചനകൾ എല്ലാ ഇനം മൃഗങ്ങളിലും ഒരുപോലെയാകണമെന്നില്ല.
ഉദാഹരണത്തിന് ടോയ് ബ്രീഡ്സ് എന്ന് വിളിക്കപ്പെടുന്ന കുഞ്ഞൻ നായ്ക്കളിൽ ഹൃദയസംബന്ധമായ പ്രശ്നങ്ങൾ കൂടുതൽ കാണപ്പെടുമ്പോൾ പൂച്ചകളിൽ വൃക്ക സംബന്ധമായ മാറ്റങ്ങളാണ് പ്രായമേറുന്നതിന്റെ ആദ്യ സൂചനകൾ നൽകുന്നത്. പ്രായമാകുമ്പോഴുണ്ടാകുന്ന മാറ്റങ്ങളോട് അനുരൂപപ്പെടാൻ ഓമന മൃഗങ്ങളെ സഹായിക്കുക എന്നത് പ്രധാനമാണ്. വാർദ്ധക്യസഹജമായ മാറ്റങ്ങളേയും രോഗങ്ങളേയും എത്രയും നേരത്തെ കണ്ടെത്തുക ആവശ്യമായ ചികിൽസ നൽകുക ജീവിത സാഹചര്യങ്ങൾ പരിഷ്കരിക്കുക എന്നിവയാണ് ഉടമയുടെ മുൻപിലുള്ള പ്രധാന ദൗത്യം.
ഉപാപചയ പ്രവർത്തനങ്ങളും, ജീവിതശൈലീ രോഗങ്ങളും
പ്രായമാകുന്നതോടെ ഭക്ഷണത്തിലെ പോഷകങ്ങളുടെ ഉപാപചയ പ്രവർത്തനങ്ങളിൽ മാറ്റം വരുന്നു. ഓട്ടവും, ചാട്ടവും, ചുറുചുറുക്കും കുറയുന്നതോടെ ശരീരത്തിനാവശ്യമായ ഊർജ്ജത്തിന്റെ അളവിൽ കുറവുണ്ടാകുന്നു. അതിനാൽ കൂടുതലായി വരുന്ന ഊർജ്ജം കൊഴുപ്പടിഞ്ഞ് പൊണ്ണത്തടി അഥവാ അമിതഭാരമെന്ന പ്രശ്നത്തിലേക്കും, പ്രമേഹത്തിനും കാരണമാകാം. വ്യായാമത്തോടുള്ള മടുപ്പ്, എഴുന്നേൽക്കാനും നടക്കാനുമുള്ള ബുദ്ധിമുട്ട് എന്നിവ പൊണ്ണത്തടിയുടെ ലക്ഷണങ്ങളാകുമ്പോൾ അമിതമായ ദാഹവും, മൂത്ര വിസർജ്ജനവും, ശരീരഭാരം നഷ്ടപ്പെടലും, ഛർദ്ദിയും, ക്ഷീണവും, പ്രമേഹ ലക്ഷണങ്ങളാണ്.
ഭക്ഷണത്തിലെ ഊർജ്ജത്തിന്റെ അളവ് കുറയ്ക്കാൻ കൊഴുപ്പ് കുറഞ്ഞ, കൂടുതൽ നാരടങ്ങിയ ഭക്ഷണ രീതിയിലേക്ക് നായ്ക്കളെ മാറ്റണം. രോഗങ്ങളോ മറ്റു കാരണങ്ങൾ കൊണ്ടോ വയസായ നായ്ക്കൾ തീറ്റയെടുക്കുന്നത് കുറഞ്ഞാൽ അതു നികത്താനുള്ള സപ്ലിമെന്റുകൾ നൽകണം. നായ്ക്കളുടേതിൽ നിന്നും വ്യത്യസ്തമായി ഊർജ്ജാവശ്യത്തിൽ കുറവു വരാത്ത പൂച്ചകളിൽ വയസുകാലത്ത് പൊണ്ണത്തടി പ്രശ്നമാകാറില്ല. പകരം വയസായ പൂച്ചകളിൽ കൊഴുപ്പ് നഷ്ടപ്പെടാനുള്ള പ്രവണത കാണുന്നതിനാൽ തീറ്റയിലെ കൊഴുപ്പിന്റെ അളവോ, ഗുണമോ കൂട്ടേണ്ടതായി വരുന്നു.
ചർമ്മവും രോമാവരണവും
കൗമാര യൗവ്വനങ്ങളിൽ സൗന്ദര്യത്തിന്റെ കണ്ണാടിയായിരുന്ന ചർമ്മവും, രോമാവരണവും കട്ടി കുറഞ്ഞ് ശുഷ്കിച്ചു തുടങ്ങുന്നു. മനുഷ്യനെപ്പോലെ നര വീണു തുടങ്ങുന്ന രോമങ്ങൾ മൂക്കിന്റെ അറ്റത്തും, കണ്ണുകൾക്കു ചുറ്റിലും, ചാരനിറത്തിൽ മങ്ങിത്തുടങ്ങുന്നു. രോമാവരണത്തിന് പ്രത്യേകിച്ച് മലദ്വാരത്തിന്റെ ഭാഗങ്ങളിലും മറ്റും അതീവ ശ്രദ്ധയോടെ കൃത്യമായ ഗ്രൂമിങ്ങ് നടത്തണം. ഫാറ്റി ആസിഡുകൾ അടങ്ങിയ സപ്ലിമെന്റുകൾ ഒരു പരിധിവരെ രോമാവരണത്തിന്റെ തിളക്കം തിരിച്ചു നൽകാൻ സഹായിക്കും. നായ്ക്കളിലും, പൂച്ചകളിലും ചർമ്മത്തിന്റെ കനം കുറയുന്നതിനാൽ പരിക്കേൽക്കാൻ സാധ്യത കൂടുന്നു.
അർബുദങ്ങളോ, മുഴകളോ, ചർമ്മത്തിൽ പ്രത്യക്ഷപ്പെടാം. വരണ്ടു തുടങ്ങുന്ന ചർമ്മവും പ്രശ്നമുണ്ടാക്കുന്നു. ചൊടിയും ചുണയും നഷ്ടപ്പെട്ട് ഊർജ്ജ്വസ്വലത നഷ്ടപ്പെട്ട് കൂടുതൽ സമയവും കിടക്കുന്നതിനാൽ കൈമുട്ടുകളിൽ കട്ടിയുള്ള തഴമ്പുകൾ പ്രത്യക്ഷപ്പെടുന്നു. പരുക്കൻ പ്രതലങ്ങളിൽ കിടക്കുന്നവയിൽ ഈ പ്രശ്നം കൂടുതലാകുന്നു. വലിയ ജനുസ്സുകളിലാണ് ഇത് അധികവും പ്രത്യക്ഷപ്പെടുക. നായ്ക്കൾക്കായുള്ള മെത്തകളോ അല്ലെങ്കിൽ ഓർത്തോപീഡിക് ബെഡുകളോ ഉപയോഗിച്ച് ഈ പ്രശ്നം ലഘൂകരിക്കാൻ ശ്രമിക്കാം. കാൽപാദത്തിന്റെ അടിഭാഗമായി ഫുട്പാഡു കളുടേയും കട്ടി കൂടുന്നു. നഖങ്ങൾ എളുപ്പത്തിൽ പൊട്ടുന്ന സ്ഥിതിയാകുന്നതിനാൽ നഖം വെട്ടുമ്പോൾ കൂടുതൽ ശ്രദ്ധ നൽകുകയും നഖം ഇട്യ്ക്കിടെ വെട്ടുകയും ചെയ്യണം. നടപ്പും, ഓട്ടവും കുറയുന്നതോടെ നഖങ്ങൾക്ക് സ്വാഭാവിക തേയ്മാനത്തിനുള്ള അവസരം കുറയുന്നുവെന്നതും ഓർക്കുക.
കുറയുന്ന ചലനങ്ങൾ, സന്ധിവീക്കം
വലിപ്പമേറിയ ജനുസ്സുകളിലും നട്ടെല്ലിന് രോഗസാധ്യത കൂടുതലുള്ള ഡാഷ്ഫണ്ട്, ബാസറ്റ് ഹൂണ്ട് മുതലായ ജനുസ്സുകളിലും പ്രായമാകുമ്പോൾ സന്ധിവാതം അല്ലെങ്കിൽ വീക്കം അതിസാധാരണമാണ്. ചെറുപ്രായത്തിൽ സന്ധികളിൽ ക്ഷതമേറ്റ നായ്ക്കളും പ്രായമാകുമ്പോൾ ഇതിനടിമയാകും. സന്ധിയിൽ ഒരു ചെറിയ പിടുത്തം എന്നതു മുതൽ ചലന സ്വാതന്ത്ര്യം നഷ്ടപ്പെടുന്ന വഷളായ സ്ഥിതിവരെ കാണപ്പെടാം. എഴുന്നേൽക്കാനുള്ള ബുദ്ധിമുട്ട്, പടികൾ കയറാനും, ചാടാനുമുള്ള പ്രയാസം, സ്വഭാവ വ്യതിയാനങ്ങൾ എന്നിവ ലക്ഷണങ്ങളാണ്. പേശീവലിപ്പം കുറയുകയും, അസ്ഥാനത്ത് മലമൂത്ര വിസർജ്ജനം നടത്തുകയുമൊക്കെ ചെയ്യാം. കോൺഡ്രോയിറ്റിൻ, ഗ്ലൂക്കോസാമൈൻ എന്നിവ അടങ്ങിയ സപ്ലിമെന്റുകൾ, നീർവീക്കം, വേദന സംഹാരികൾ എന്നിവ ഡോക്ടറുടെ നിർദ്ദേശപ്രകാരം നൽകാം. എന്നാൽ ഡോക്ടറുടെ കൃത്യമായ നിർദ്ദേശമില്ലാതെ പൂച്ചകൾക്ക് വേദനസംഹാരികൾ ഒരു കാരണവശാലും നൽകരുത്. വ്യായാമം കുറയുന്നതോടെ പേശികളുടെ വലിപ്പം കുറയുന്നു.
നടക്കാൻ ബുദ്ധിമുട്ട് തോന്നുന്നതോടെ നടപ്പുതന്നെ ഒഴിവാക്കുക പതിവുശീലമാകുന്നു. ഈ അവസ്ഥ വ്യായാമം തീരെ കുറയാനും മറ്റു പ്രശ്നങ്ങളുടെ വിഷമവൃത്തത്തിലേക്ക് കടക്കാനും കാരണമാകുന്നു. മാംസപേശികൾ, ഹൃദയം, മനോഭാവം എന്നിവ മെച്ചപ്പെടാൻ വ്യായാമം അനിവാര്യമാണ്. നായ്ക്കളുടെ കഴിവനുസരിച്ച് ഹ്രസ്വമായ വ്യായാമം പലവട്ടം നൽകി മസിലുകളെ ബലപ്പെടുത്തണം. കയറാനും ഇറങ്ങാനും പടികൾ, ചരിവുകൾ എന്നിവ നൽകുക, ഉയർത്തി വയ്ക്കാവുന്ന തീറ്റപ്പാത്രങ്ങൾ, ഓർത്തോപീഡിക് മെത്തകൾ എന്നിവ നടക്കുമ്പോൾ ബുദ്ധിമുട്ടുന്ന, വേദന കാണിക്കുന്ന നായ്ക്കൾക്ക് കൈത്താങ്ങാകും.
ദന്തരോഗങ്ങൾ
ദന്തരോഗങ്ങളാണ് വാർദ്ധക്യകാല പ്രശ്നങ്ങളിൽ ഏറ്റവും പൊതുവായി കാണപ്പെടാറു ള്ളത്. മൂന്നു വയസ് കഴിയുന്നതോടെ തന്നെ എൺപതുശതമാനത്തിലധികം നായ്ക്കളും ദന്ത മോണ രോഗങ്ങൾ കാണിച്ചു തുടങ്ങുന്നു. വായ്നാറ്റം, ഭക്ഷണം കഴിക്കാനുള്ള ബുദ്ധിമുട്ട്, ശരീരഭാരം കുറയുക തുടങ്ങിയ ലക്ഷണങ്ങളുണ്ടാകും. ചെറുപ്പം മുതലേയുള്ള കൃത്യമായ ദന്ത പരിചരണം പ്രത്യേകിച്ച് ബ്രഷ് ചെയ്യൽ രോഗസാധ്യത കുറയ്ക്കാൻ സഹായിക്കും. ജീവനുവരെ ഭീഷണിയാകുന്ന പരിണതഫലങ്ങൾക്ക് ദന്തരോഗങ്ങൾ വഴിയൊരുക്കുമെന്ന തിനാൽ ശാസ്ത്രീയ ദന്ത പരിചരണത്തിൽ ഉപേക്ഷ വേണ്ട.
ദഹനവ്യൂഹ പ്രശ്നങ്ങൾ
പ്രായമാകുന്നതോടെ ദഹനനാളത്തിലൂടെയുള്ള ഭക്ഷണത്തിന്റെ ചലനം മന്ദഗതി യിലാവുകയും അത് മലബന്ധത്തിന് കാരണമാവുകയും ചെയ്യുന്നു. മലവിസർജ്ജന സമയത്ത് വേദനയുള്ള നായ്ക്കളിൽ ഈ പ്രശ്നം കൂടുതലായിരിക്കും. ഇടുപ്പെല്ലിന്റെ പ്രശ്നം, മലദ്വാരത്തിലെ ഗ്ലാൻഡുകളുടെ അസുഖം എന്നിവ വേദനയ്ക്ക് കാരണമാകും. നിഷ്ക്രിയമായ ജീവിതശൈലിയും, ചില രോഗങ്ങളും മലബന്ധത്തിന് കാരണമാകാം. മലബന്ധമുള്ള നായ്ക്കളെ വെറ്ററിനറി പരിശോധനയ്ക്ക് വിധേയമാക്കണം.
വയറിളക്കാനുള്ള മരുന്നുകൾ, കൂടുതൽ നാരടങ്ങിയ ഭക്ഷണം, ധാരാളം ശുദ്ധജലം നൽകൽ എന്നിവയ്ക്കൊപ്പം സന്ധിപ്രശ്നങ്ങൾ, മലദ്വാര ഗ്രന്ഥിയുടെ അസുഖങ്ങൾ എന്നിവയും ചികിത്സിക്കണം. പൂച്ചകളിൽ ആമാശയത്തിൽ മുടിക്കെട്ടുകൾ അടിഞ്ഞുകൂടി മലബന്ധം ഉണ്ടാകാം. ഛർദ്ദി, വയറിളക്കം, വിശപ്പില്ലായ്മ, ശരീരഭാരം കുറയൽ, മലത്തിൽ ചോരയുടെ അംശം, കറുത്ത ടാറിന്റെ നിറമുള്ള മലം, മലവിസർജ്ജനത്തിന്റെ തോതിലുള്ള വർദ്ധന ഇവയൊക്കെ പ്രായമാകുമ്പോൾ ദഹനവ്യൂഹത്തിലുണ്ടാകുന്ന മാറ്റങ്ങളുടെ, രോഗങ്ങളുടെ ലക്ഷണങ്ങളാകാം.
നഷ്ടമാകുന്ന രോഗപ്രതിരോധശക്തി
പ്രായമാകുന്നതോടെ രോഗപ്രതിരോധ സംവിധാനം ഫലപ്രദമായി പ്രവർത്തിക്കുന്നത് കുറയും. അതിനാൽ സാംക്രമിക രോഗങ്ങൾ പിടിപെടാനുള്ള സാധ്യതയും, രോഗതീവ്രതയും കൂടും. രോഗപ്രതിരോധ കുത്തിവെയ്പുകൾ കണിശതയോടെ കൃത്യസമയങ്ങളിൽ നൽകണം.
പ്രധാന അവയവങ്ങളുടെ പ്രശ്നങ്ങൾ
മർമ്മ പ്രധാന അവയവങ്ങളായ ഹൃദയം, ശ്വാസകോശം, കരൾ, വൃക്കകൾ എന്നിവയ്ക്കുണ്ടാകുന്ന മാറ്റങ്ങളും, രോഗങ്ങളും വാർദ്ധക്യത്തിൽ നിർണ്ണായകമാകുന്നു. ഹൃദയത്തിന്റെ പ്രവർത്തനക്ഷമത കുറയുന്നു. നായ്ക്കളിൽ പ്രത്യേകിച്ച് ചെറു ജനുസ്സുകളിൽ മിട്രൽ വാൽവുകളുടെ പ്രശ്നം കാണപ്പെടുന്നു. ചെറിയ ഹൃദ്രോഗ ബാധ വാർദ്ധക്യത്തിൽ പ്രതീക്ഷിക്കാമെങ്കിലും ചെറുപ്പത്തിലേ ഹൃദയപ്രശ്നമുള്ളവയിൽ, പ്രായമാകുമ്പോൾ കഠിനമായ ഹൃദ്രോഗബാധയുണ്ടാകാം. എക്സ്-റേ, ഇ.സി.ജി. എന്നിവ വഴി രോഗനിർണ്ണയം നടത്താം. വ്യായാമം ചെയ്യാനുള്ള ബുദ്ധിമുട്ട്, ചുമ പ്രത്യേകിച്ച് രാത്രികാലങ്ങളിൽ ശരീരഭാരം കുറയൽ, കൂടുതലായി അണയ്ക്കുക, ബോധക്ഷയം എന്നിവ ഹൃദയ, വാൽവ് പ്രശ്നങ്ങളുടെ ലക്ഷണങ്ങളാണ്. ശ്വാസകോശങ്ങളുടെ ഇലാസ്തികത കുറയുന്നതോടെ രക്തത്തിലെ ഓക്സിജന്റെ അളവു കുറയുകയും നായ്ക്കൾ പെട്ടെന്ന് ക്ഷീണിക്കുകയും, ശ്വസന സംബന്ധിയായ അസുഖങ്ങളുണ്ടാവുകയും ചെയ്യുന്നു.
പ്രായമേറുന്നതോടെ വൃക്കരോഗങ്ങൾക്കുള്ള സാധ്യത കൂടുന്നു. ഇത് വൃക്കകളുടെ സ്വന്തം പ്രശ്നമോ, ഹൃദ്രോഗം പോലുള്ള മറ്റു രോഗങ്ങൾ മൂലമോ ആകാം. അമിത ദാഹം, കൂടുതലായി മൂത്രമൊഴിക്കൽ, ഛർദ്ദി, ശരീരഭാരം കുറയുക, വിശപ്പില്ലായ്മ, തളർച്ച, വിളറിയ മോണ, വയറിളക്കം, ചോര കലർന്ന ഛർദ്ദിൽ, കറുത്ത ടാർ നിറത്തിലുള്ള മലം, വായ്നാറ്റം, വായിലെ വ്രണങ്ങൾ, സ്വഭാവ വ്യതിയാനങ്ങൾ എന്നിവ വൃക്കരോഗത്തിന്റെ ലക്ഷണങ്ങളാണെങ്കിലും പലപ്പോഴും എഴുപതു ശതമാനം നാശം വൃക്കകൾക്കുണ്ടാ കുമ്പോഴാകും പല ലക്ഷണങ്ങളും കാണിച്ചു തുടങ്ങുക. അതിനാൽ നേരത്തെ രക്തം, മൂത്രം എന്നിവ പരിശോധിച്ച് രോഗനിർണ്ണയം നടത്തുക പ്രധാനമാണ്. കൂടാതെ വൃക്ക തകരാറിലാ യാൽ ഭക്ഷണം, മരുന്നുകൾ ഇവയുടെ അളവിൽ വ്യത്യാസം വരുത്തണം. മൂത്രാശയ കല്ലുകൾ, മൂത്ര വിസർജ്ജനം നിയന്ത്രിക്കാനാവാതെ അസ്ഥാനത്ത് മൂത്രമൊഴിക്കുക തുടങ്ങിയ പ്രശ്നങ്ങൾ വയസുകാലത്ത് പ്രത്യേകിച്ച് വന്ധ്യംകരണം നടത്തിയ പെൺപട്ടികളിൽ കാണപ്പെടാം. വിശ്രമിക്കുമ്പോഴും ഉറങ്ങുമ്പോഴും ചെറിയ അളവിൽ മൂത്രം പോകുന്നത് ഇതിന്റെ ലക്ഷണമാണ്. വർഷങ്ങളോളം ശീലിച്ചതിൽ നിന്ന് വ്യത്യസ്തമായി അസ്ഥാനത്തും, അസമയത്തും മലമൂത്ര വിസർജ്ജനം നടത്തുന്നത് വാർദ്ധക്യത്തിന്റെ ശാപമാണ്.
ശരീരത്തിലെ ഏറ്റവും അതിജീവനശേഷിയള്ള കരളിനും വയസാകും. ഛർദ്ദി, വിശപ്പില്ലായ്മ, സ്വഭാവ വ്യതിയാനങ്ങൾ, വിളറിയ മഞ്ഞ നിറമുള്ള മോണ എന്നിവ ലക്ഷണങ്ങളാകാം. രക്ത, മൂത്ര പരിശോധനയാണ് പ്രധാനം കരൾ രേഗമുള്ള നായ്ക്കൾക്ക് നൽകുന്ന മരുന്നുകളുടെ അളവിൽ വ്യത്യാസം വരുത്തണം. എട്ടു വയസ്സ് കഴിയുന്നതോടെ വന്ധ്യംകരണം ചെയ്യപ്പെടാത്ത നായ്ക്കളിൽ എൺപതുശതമാനത്തിനും പ്രോസ്റ്റേറ്റ് ഗ്രന്ഥിവീക്കം ഉണ്ടാകുന്നു. ചില ഗ്രന്ഥികൾ ഹോർമോണുകൾ കൂടുതൽ ഉത്പാദിപ്പിക്കുന്നതും മറ്റു ചിലത് ഉൽപ്പാദനം കുറയ്ക്കുന്നതും വാർദ്ധക്യ പ്രശ്നങ്ങളാണ്. വയസൻ പൂച്ചകളിൽ ഹൈപ്പർ തൈറോയിഡിസം കാണപ്പെടുമ്പോൾ വയസായ ഗോൾഡൻ റിട്രീവർ നായ്ക്കളിൽ ഹൈപ്പോ തൈയോയിഡിസം കാണപ്പെടുന്നു. എല്ലുകളിലെ മജ്ജയിൽ കൊഴുപ്പ് അടിഞ്ഞുകൂടുന്നത് രക്തകോശങ്ങളുടെ ഉത്പാദനം കുറയാനും അതുവഴി വരൾച്ചയ്ക്കും കാരണമാകും.
അർബുദം പടിവാതിൽക്കൽ
ശരീരത്തിന്റെ വിവിധ ഭാഗങ്ങളിൽ വരുന്ന, അപ്രത്യക്ഷമാകാതെ, വളരുന്ന മുഴകൾ, ഉണങ്ങാത്ത മുറിവുകൾ, ശരീരഭാരം കുറയൽ, വിശപ്പില്ലായ്മ, ശരീര ദ്വാരങ്ങളിൽ നിന്നുള്ള രക്തസ്രാവം, ഭക്ഷണം കഴിയ്ക്കാനുള്ള ബുദ്ധിമുട്ട്, ബുദ്ധിമുട്ടിയുള്ള ശ്വസനം, മലമൂത്ര വിസർജ്ജനത്തിലെ ബുദ്ധിമുട്ട് എന്നിവ അർബുദ ലക്ഷണങ്ങളാകാം. പെൺപട്ടികളിൽ സ്തനങ്ങൾ പരുക്കനാകുകയും വന്ധ്യംകരണം നടത്താത്തവയിൽ സ്തനാർബുദം കൂടുതലായി കാണപ്പെടുകയും ചെയ്യുന്നു. കൃത്യമായ ശരീര പരിശോധന ഇതു തിരിച്ചറിയാൻ ആവശ്യമാണ്.
നഷ്ടമാവുന്ന കാഴ്ചയും കേൾവിയും
ഒരു കാലത്ത് ഏറ്റവും സൂക്ഷ്മമായിരുന്ന കാഴ്ചയും കേൾവിയും പഴയ പ്രതാപത്തിൽ നിലനിർത്താനാവാതെ വരുന്നത് നായ്ക്കളെ ഏറെ ബാധിക്കുന്നു. ചില നായ്ക്കൾക്ക് കേൾവി പൂർണ്ണമായി നഷ്ടപ്പെടാം. ചെറിയ രീതിയിലുള്ള കേൾവിക്കുറവ് പലപ്പോഴും ശ്രദ്ധിക്കപ്പെടാതെ പോകുന്നു. പലപ്പോഴും പ്രശ്നം ഉടമ തിരച്ചറിയുന്നതിനു മുമ്പ് തന്നെ അത് സങ്കീർണ്ണ മായിരിക്കും. ഉടമ നൽകുന്ന നിർദ്ദേശങ്ങൾ അനുസരിക്കാതിരിക്കുക, അക്രമണ സ്വഭാവം കാണിക്കുക എന്നിവ കേൾവിക്കുറവിന്റെ ലക്ഷണങ്ങളാകാം. നഷ്ടപ്പട്ട കേൾവിശക്തി തിരിച്ചു കിട്ടാൻ പ്രയാസമാണ്. എന്നാൽ ഇതിന്റെ ഫലങ്ങൾ കുറയ്ക്കാനുള്ള കാര്യങ്ങൾ ചെയ്യാവുന്നതാണ്. നിർദ്ദേശങ്ങൾ നൽകാൻ ശബ്ദത്തിനൊപ്പം കൈമുദ്രകൾ നൽകി ചെറുപ്പത്തിൽ തന്നെ പഠിപ്പിയ്ക്കാം. കേൾവി നഷ്ടപ്പെട്ടാലും, തരംഗങ്ങൾ തിരിച്ചറിയാവുന്ന തിനാൽ കയ്യടിക്കുന്നതും, തറയിൽ ചവിട്ടുന്നതും തിരിച്ചറിയപ്പെട്ടേക്കാം. തിമിരം, ഗ്ലൗക്കോമ, ഡ്രൈ ഐ തുടങ്ങിയ പ്രശ്നങ്ങൾ വാർദ്ധക്യ സഹജമാണ്. കണ്ണിന്റെ മൂടൽ, മറ്റു വസ്തുക്കളിൽ പോയി ഇടിക്കുക, സാധനങ്ങൾ തിരിച്ചെടുക്കാൻ കഴിവു കുറയുക, കണ്ണിൽ പീളകെട്ടുക ഇവയൊക്കെ ലക്ഷണങ്ങളാണ്. കാഴ്ചയിലോ, കണ്ണിലോ ഉണ്ടാകുന്ന വ്യതിയാനങ്ങൾ പരിശോധനാവിധേയമാക്കണം.
സ്വഭാവ വ്യതിയാനങ്ങൾ
പ്രായമേറുന്നതോടെ തലച്ചോറിലെ കോശങ്ങൾ മൃതമാവുകയോ, പ്രവർത്തനം കുറയുകയോ ചെയ്യുന്നു. നാഡീകോശങ്ങൾ തമ്മിലുള്ള ആശയ വിനിമയവും കുറയുന്നു. ഇത്തരം മാറ്റങ്ങൾ പലപ്പോഴും നായ്ക്കളുടെ സ്വഭാവത്തിലും മാറ്റങ്ങളുണ്ടാക്കുന്നു. ആശയക്കുഴപ്പം, പെട്ടെന്ന് ക്ഷോഭിക്കുക, അസ്വസ്ഥരാവുക, ശീലങ്ങൾ തെറ്റുക, അസ്ഥാനത്തുള്ള മലമൂത്ര വിസർജ്ജനം, സമ്മർദ്ദം താങ്ങാൻ കഴിവ് കുറയുക, ശബ്ദങ്ങളോടുള്ള കൂടിയ പ്രതികരണം, കൂടുതൽ ഓളിയിടൽ, ക്രമരഹിതമായ ചലനം, ആകാംക്ഷ, വിരഹദു:ഖം, കുറയുന്ന വൃത്തിയും, വെടിപ്പും, അലഞ്ഞു തിരിയൽ, ഉറക്കത്തിന്റെ ക്രമം നഷ്ടപ്പെടൽ, ബോധക്കുറവ് തുടങ്ങി സുഹൃത്തുക്കളേയും, കുടുംബാംഗങ്ങളേയും തിരിച്ചറിയാൻ കഴിയാത്ത അവസ്ഥവരെയുള്ള വ്യതിയാനങ്ങൾ സ്വഭാവത്തിലുണ്ടാകും. ഒരുപരിധിവരെ മരുന്നുകൾ, സ്വഭാവ വ്യതിയാന ചികിത്സാ രീതികളും പരീക്ഷിക്കാവുന്നതാണ്.
പ്രായമാകുന്നതോടെ ശരീരതാപനില ക്രമീകരിക്കാനുള്ള കഴിവു കുറയുന്നതിനാൽ താപനിലയിലുള്ള മാറ്റങ്ങളുമായി പൊരുത്തപ്പെടാൻ ബുദ്ധിമുട്ടും അതിനാൽ തണുപ്പിൽ നിന്നും ചൂടിൽ നിന്നും സംരക്ഷിക്കാൻ പരിപാലന മുറകളിലും, സൗകര്യങ്ങളിലും മാറ്റം വരുത്തണം.
ഇനവും, ശരീര വലിപ്പവുമനുസരിച്ച് ഇരുപതു മുതൽ എൺപതു വർഷം വരെ ആയുസ്സുള്ളവരാണ് മിക്ക അരുമ പക്ഷികളും. പക്ഷിരോഗങ്ങൾ, ചികിത്സ എന്നിവയിലുണ്ടായ വലിയ പുരോഗതി, മെച്ചപ്പെട്ട ആഹാരക്രമം, കൃത്യമായ പരിപാലനം എന്നിവ വഴി അരുമ പക്ഷികളുടെ ആയുസ്സിലും വർദ്ധനയുണ്ടായിരിക്കുന്നു. അതിനാൽ അരുമപക്ഷികളിലെ വാർദ്ധക്യ പരിചരണവും പ്രാധാന്യമർഹിക്കുന്നു. തിമിരം, അർബുദം, സന്ധിവീക്കം, ഹൃദയ, ധമനി പ്രശ്നങ്ങൾ, അനീറോ സ്ക്ലീറോസിസ്, പൾമണറി ഹൈപ്പർ ടെൻഷൻ, ഹൃദ്രോഗം, പോഡോഡെർമറ്റൈറ്റിസ്, വൃക്ക സംബന്ധമായ രോഗങ്ങൾ എന്നിവയാണ് അരുമപക്ഷികളിൽ കാണപ്പെടുന്ന വാർദ്ധക്യകാല രോഗങ്ങൾ.
ആറുമാസത്തിലൊരിക്കൽ എന്ന വിധത്തിലുള്ള സമ്പൂർണ്ണ വെറ്ററിനറി പരിശോധന, ശാസ്ത്രീയ ഭക്ഷണക്രമം, ശരീര ഭാര നിയന്ത്രണം, പരാദ നിയന്ത്രണം, ഉചിതമായ വ്യായാമം, പ്രതിരോധകുത്തിവെയ്പുകൾ, മാനസികാരോഗ്യം, ചേരുന്ന പരിസ്ഥിതി, പ്രത്യുത്പാദന പ്രശ്നങ്ങളിലെ ശ്രദ്ധ എന്നിവയിലൂന്നിയ പരിചരണ രീതിയിലൂടെ വേണം ജീവിതാവസാനം കഴിച്ചു കൂട്ടാൻ അരുമകൾക്ക് അവസരമൊരുക്കേണ്ടത്.
Content highlights: Animal husbandry, Geriatrics